top of page
mëttelalterlech Kichen
 

Dës Kichen gouf am 12. Joerhonnert tëscht dem ale Sall, der Kapell an der baussegter Mauer vun der Buerg eran gebaut - domat erkläert sëch den onregelméissegen Plang vun dem Raum.

​

A spéiderer Zäit gouf en zweete Stack uewen drop gebaut, als Wunnraum (fir d'Kichenpersonal?), deen war vun hei iwwer eng hëlze Trap zougänglech.

​

Dës "al" Kiche gouf ageriicht fir fir den Haff vun de Grofe vu Veianen ze kachen. Giess gouf am Ufank am ale Sall, méi spéit am sougenannte "klenge Palais" (Ritterstuff, Garnisoun, Galerie).

 

Mam Bau vum sougenannte "grousse Palas" (grousse Sall) an däer "neier" herschaftlecher Kichen huet dës Plaz hieren ursprenglechen Zweck verluer. Bis Enn vum 17. Joerhonnert ass se awer nach als Kichen benotzt gin; wahrscheinlech fir d'Garnisoun mat Iessen ze versueren.

 

Am 14. Joerhonnert gouf eng drëtt Kichen (d'Jülicher Kichen) installéiert, wahrscheinlech fir d'Versuergung vun der Buergverwaltung. Haut ass näischt méi vun dëser ze gesinn.

 

Et goufen also dräi verschidde Kichen an der Käerbuerg, déi (mat hiren Niewereim) iwwer 400 Quadratmeter agehollt hun!

Spentgen

d'Konstruktioun vun der baussegte Mauer vum Schlass (op Béi fir vrum "Sappéieren"  ze schützen) huet et méiglech gemaach "Nischen" am décke Mauerwierk ze installéieren. Dës goufen haaptsächlech als Spentgen (Liëwensmettelreserve) benotzt, déi lénks gouf och als Spullkichen benotzt, während op der rietser Säit eng Dier zu engem Schacht féiert, an deem en Opzoch installéiert war fir Feierholz an aner Saachen fir d'Kichen hei erop ze kréien.

Kärenkierf

Käere goufen a Kierf gemaach fir se prett ze hun, an an enger Handmillen gemuelen wann néideg

(Original Kierf aus 19. Joerhonnert, MNHA)

​

Koffer Kessel

esou eng grouss Kofferkesselen goufe fir vill Zwecker benotzt, z.B. Béier brauen

(original 19. Joerhonnert)

Kéispress

Mat der Mëllech déi ze vill war gouf Kéis gemaach, an esou konnt een aus der Mëllech en Produkt maachen waat laang gehaalen huet. An der Press gouf iwwerschësseg Waasser aus dem frësche Kéis eraus gedreckt.

(Original)

Fläsch fir Drënkwaasser

Dës Keramikfläschen haten keng Glasur, sou datt Waasser duerch d'Wand verdonsten konnt, wat e Killeffekt haat.

(Reproduktioun)

Aquamanile

D'Aquamanile ass fir d'Hänn ze wäschen, virum a während dem Iessen

(Reproduktioun 14. Joerhonnert Aquamanile).

"Sturzbecher"
​

Zeremoniellen Drënkbecher deen net ofgestallt ka ginn wann nach eppes dran ass, sou datt een gezwongen ass alles an enger Kéier ze drénken.

Uewen

Dësen Uewen gouf vun der Kamäinsäit befeiert, während d'Gebäck vun hannen (Säit vum Opzochsschacht) eran an eraus gehollt gin ass. Den Feierdamp ass duerch e Lach an de Kamäin eraus komm.

Kamäin

Am 12. Joerhonnert gouf iwwer dem oppene Feier um Buedem (ënnert dem Kamäin) gekacht. Bedenkt w.e.g. datt den Niveau vum Kamäinsbuedem déi ursprénglech Héicht vum Buedem vum ganze Raum war. Wärend de Kamäin mat Steen ausgekleed war, war de Buedem vum Rescht vum Zëmmer aus Holz gemaach. Spéider gouf dëst geännert (an de Buedemniveau erof gesat?) an de Buedem mat groe Sandsteenplacken beluecht (haut Schiefer).

Dëppen & Kessel aus Keramik

Daat éischt Kachgeschier gouf aus Leem gemaach an an d'Feier oder Glous gestallt. E puer hate Féiss (Grapen-Typ) sou datt se einfach iwwer e klengt Feier oder Glous plazéiert konne ginn

(ausgestallt: Reproduktiounen).

Hiel

Nieft Keramikdeppen goufen am Héichmëttelalter Koffer- an Eisenkesselen benotzt. Dës Metalldëppen konnten iwwer d'Feier gehaange ginn. Dofir huet een en Hiel gehollt, wou een d'Héicht vum Deppen iwer dem Feier verstellen konnt.

(ausgestallt: Reproduktiounen).

Paan

Paane goufe mat Hëllef vun engem Dräifouss iwwer d'Feier oder d'Glous gestallt.

Dës Pan ass original, den Dräifouss ass eng Reproduktioun.

Handmillen

Fruucht ass op der Buerg gelagert a wéi néideg an der Banmillen ënnen un der Our gemuelen ginn, oder awer bäi enger Belagerung mat enger klenger Handmillen (ausgestallt: Reproduktioun).

 

Enn vum 12./Ufank 13. Joerhonnert huet eng grouss Tretmillen mat Laafrad d'Handmillen ersat, déi dann awer erëm am 14. Joerhonnert duerch eng méi grouss Handmillen ersat ginn ass. Am 17. Joerhonnert waren 2 Handmillen am Asaz; ee vun de Millesteng ass nach um Buedem am Passage vun der Ritterstuff an déi ënnescht Kapell ze gesinn (hannert dem hëlze Gelänner hannen am Raum)

Deegmoul

an der Moul gouf den Deeg fir Paschtéiten an aaner Gebäck gekniet

(ausgestallt: Original 19. Jh.)

Romp

heiran konnt enn aus Rahm Botter maachen andeems een dën Still erop an erof gepompelt huet. Daat war haart Aarbecht an huet laang gedauert

(ausgestallt: original 19. Joerhonnert).

Keramik 14. Joerhonnert

Keramiks Becheren a Kréi am 14. Joerhonnert Stil. Dee ganz vir ass eng Kopie vun deenen déi hei fonnt gin sen, an déi an der archeologescher Krypta (Nopeschraum) ausgestallt sin

(ausgestallt: Reproduktiounen).

Keramik Typ "Pingsdorf"

Dës Keramik gouf vum 9. bis 13. Joerhonnert benotzt

(ausgestallt: Reproduktiounen).

bottom of page